هذه قصيده زجلية من قصائد عديدة إرتبطت بي وبهذه المجموعة العزيزة علي قلبي من أصدقائي في المنتدي
وهذه القصيدة بعنوان "الحب من منطلق مهني بحت "
طبعاً مش قصدي بالمنطلق المهني هنا القراميط اللي بيتكلم عليها المهندس ايهاب خااااااالص
الحب سمكة
الحب بلطية تاكلها تقول الله
الحب بوري مملح
في الأكل ما أحلاه
الحب حنشان بتتقطع جزايل حتت
تاكل وتشرب وتشكر ربنا في علاه
الحب سنارة
الحب سنارة تدليها
مابين الموج وتستني
وتبص بين الشطوط
وتحلم وتتمني....
وتقول ياريتك ياسنارة
الاقي فيكي حبيب
يرجعلي بعد الفراق
ويقولي إتمني
الحب مركب
الحب مركب صغير
يادوب يشيل اتنين
بحلم واحد وحتي
لوالجسد جسدين
والحلم راكب فلوكة
ماشي بسرعتها
ويقول يارب نوصل
قبل الهنا بساعتين
الحب شبكة
الحب شبكة بتصطاد
من كل نوع إتنين
بتجمع الي تطوله
واللي تشوفه العين
مالها إيدين وعيون
إلا صيادها...
يا يفرق مابين القلوب
يا يجمع الحبيبين
الحب حوض سمك
الحب حوض سمك
وحوض السمك زينه
جواه سمكة جميلة
قاعدة وحــــــــزينة
تسألها إيه السبب
في الحزن ياسمكة
تقولك حبيبي هجر
وسابني في الزينه.
الحب بحر
الحب بحر والبحر
معروف بغدره
مايحب حد يكدره
ويحط من قدره
يابحر حلمك علينا
ولا خلاص ناسي
فاكرنا دامعه حزينه
ولا خلاص ناسي
دا إحنا اللي ياما جينالك
ولا خلاص ناسي
حبينا فيك حبنا
اللي صبح ناسي
يابحر قول للهوا
لوعدي يوم حبيبين
يبعت لهم نسمته
يمكن يكون ناسي