بالأمس كنت في القاهرة .. بنت المعز .. ورغم انها ليست المرة الأولي ولا الثانية ولا حتي المرة ال 100 التي ازور فيها القاهرة واتجول في شوارعها الا انها هذه المرة كانت لها طعم ومذاق خاص جدا
فقد كنت علي موعد مع ابووعد كمان اتفقنا منذ شهور ان نتقابل انا وهو والمجموعة كلها بمجرد نزوله لمصر إلا ان باقي افراد المجموعة لم يتمكن من الحضور للقاهرة لظروف خاصة بكل واحد علي حد فباسم ربنا يكرمه ويتجوز.. بيجوز أخوة النهارده ، وهو واقف بيتخيل نفسه في الكوشة .. طيب ياعم ماتتوكل علي الله .. ليه بس الشحتفه دي
وايهاب وشلبي كان المفروض انهم جايين معايا بس أجلوا المشوار للنهارة وبعدين أجلوه لحين ميسرة ، وأنا بقولهم يا جماعة ..هي فوضي .. فكرتوني بإجتماعات المنتدي ؟؟!!!!
اتقابلت انا وبووعد تحت كوبري الفنجري الساعة 2 الظهر والجو كان حااااااااااااااار جدا ياناس ( وده كان العيب الوحيد في اليوم كله الا ان دفيء المقابلة من ابووعد نساني الجو وحرارته )
بصراحة .. اول ما شفنا بعض وتعانقنا اتكلمنا عن هذه الدنيا الغريبة . إحنا لم نر بعض من قبل الا مرة واحده من سنة تقريبا وكنا في وسط مجموعة ودلوقتي انا بقابلة وحاسس كأني بقابل صديق أعرفة من زمان قوي وأكلنا مع بعض عيش وملح ، وربنا يديم الود بيننا
حزنت جدا لما شفت ذراع ابووعد في الجبس بس أقول ايه يستاااااهل حد قاله يلعب الكورة مع العيال علي السلم.. آدي آخرة اللعب مع العيال يابووعد . ربنا يخليهم لك ويخليك ليهم.
بس.. وبعد السلام والكلام توجهنا للحسين وقعدنا هناك ساعة لن انساها أبدا .. عرفت فيها ابووعد ومعدنه الأصيل كواد ابن بلد ..اتكلمنا عن طفولتنا وافكارنا ومشاكلنا والمنتدي وأصدقائنا واتمشينا بعد كده وسط حي الحسيني وابوعد يحكيلي عن ذكرياته والمذاكرة عن الشيخ الشعراوي رحمه الله وكيف كان يداعبهم وهم مازالوا في مقتبل العمر ........
بعد كده كانت الفسحة الرائعة علي موتوسيكل ابووعد ... انا طول عمري بركب بواخر في نيل القاهرة لكن دي أول مرة أركب فيها الهوا ههههههههههههههه .. ركبنا الموتوسيكل وابووعد يدندن بأغنية أم كلثوم فكروني وانا اغني معاه لحد ما وصلنا لهدفنا .... أجمل وأحلي طبق كشري أكلته في حياتي ... والله ماهي مبالغة.... لما كنا في الحسين قلت لأبووعد انا واحشني الكشري المصري فوعدني بإنه حيأكلني طبق كشري محصلش .. وصدق في وعده بإمتياز
وذهب بي لمحل كشري أنيق في حدائق القبة ( محل إقامته )
بعد الغدا قعدنا مع بعض ندردش شوية ونتكلم في شئون منتدانا الحبيب ، وان شاء الله يكون أفضل منتدي زراعي عربي قريبا بجهودنا وكتابتنا
حان بعدها وقت الفراق .. بعد يوم أكثر من رائع لن أنساه ابدا ، ولن أنسي كرم أخينا الغالي كريم وأتمني أن تمر الأيام بسرعة ليرجع مصر الرجوع النهائي آخر العام ليحل ضيفا علي في الأسكندرية علشان نعرف نرد له جزء من كرمه وحسن ضيافته
تروح وترجع بالسلامه يا أخينا الغالي
وأشكرك مرة تانية علي اليوم الجميل ده ( رغم اني عارف انك حتقوللي مافيش شكر بين الإخوة )
والف مبرووووك لعلي عاصم عريسنا وعريس المنتدي